Мектептің іргетасы 1935 жылы қаланып, 1950 жылы мектеп болып ашылған. Білім ұясынан алпыс алтыншы түлектерін ұшырған бұл мектеп – шоқтығы биік білім ордаларының бірі. Қырық екі мұғалімі бар педагогикалық ұжымды Кожахметова Гульжан Багитжановна 2017 жылдың 7 қарашасынан бері басқарады. Бәсекеге қабілетті жас ұрпақты тәрбиелеуде, Қазақстанның гүлденуіне, білім саласының дамуына елеулі үлес қосып жүрген жаңашыл мұғалімдердің қатары жылдан-жылға көбеюде. Білім саласындағы жаңалықтар, жетістіктер мен ұстаздардың озат тәжірибесін бір-бірінен үйренуде, ұрпаққа сапалы білім, саналы тәрбие беруде аталған білім ұясында жетістіктер мол.

«Оқушы жастардың ең сенімді ұстазы, сыр жасырмай, ашық айтатын адамы – мұғалім» деп қаламгер Ғабит Мүсірепов айтпақшы, мектептің тірегі де, жүрегі де – мұғалім. Еліміздегі түбірлі өзгеріс, жаңалық сәулесі мектеп, оқушы, ұстаздар арасында да кеңінен қолдау табуда. Ең басты маңызды мәселе – ұстаздар қауымына шығармашылық жолдың ашылуы.